做facial 做到皮膚敏感加濕疹



  • 之前幫襯間美容院試做個電動微針療程. 因為之前從未做過呢啲會有傷口既療程, 上網睇人話會流血又敏感咁, 有啲驚就同美容師再三詢問會唔會有呢啲問題, 個美容師就話係電動微針呀, 枝針好幼架, 唔會好似之前啲人手微針咁會出血敏感呀咁, 我見佢之前幫我做啲普通facial 都OK, 就幫襯佢試做左.

    試做完之後, 佢就係咁游說我幫佢買療程, 我認我衰耳仔軟, 但個心又十五十六, 所以只係俾左deposit. 收左錢後個美容師無同我講有關之後既護膚程序, 直到後黎我先喺其他地方得知原來做完係唔好用水喉水洗面.

    就喺做完個facial 兩三日開始, 我塊面開始甩皮, 尤其係下巴個位, 咁我開頭以為係轉天氣, 我本身塊面係乾性會出油嗰啲, 我就以為係並普通甩皮, 就keep 住保濕同敷mask. 但情況無改善, 都係keep 住甩皮同紅紅地. 跟住維持左呢個情況成三個星期, 我終於頂唔住, 走去睇醫生, 醫生話我係皮膚炎, 我再睇埋皮膚科, 就證實左我係濕疹. 我成世人幾十歲, 都未試過有濕疹, 屋企人都無人有試過, 嗰一下我真係呆左唔明點解.

    醫生話有機會係食錯嘢或者其他刺激, 但嗰段時間我無食特別既食物或者之前唔食或者未食過既食物, 醫生話有可能係佢啲工具唔乾凈都有可能引起刺激.

    咁我就同間美容院講番我個情況, 開頭佢地唔肯認, 講到好似係我講大話咁, 我真係好唔開心, 我個樣己經到咁, 你仲要話係我講大話. 後黎佢肯俾番第一次睇皮膚科既錢俾我(幾百蚊), 但俾我嗰時又俾我聽, 話我係特別例子, 其實唔應該賠俾我, 講到我隔咁耐先同佢講係屈佢食死貓咁.

    咁我都算, 我其實唔係要佢賠償啲咩俾我, 我只係想退番我俾左嗰啲錢 (我成個療程係未用過的, 之前試做係另外分開俾錢), 佢竟然話唔肯退, 話之前俾錢嗰時張單上面寫住無論任何情況下都唔可以退錢. 我認係我無睇清, 但個美容師都由頭到尾無提過呢一點. 咁我話無得退錢, 咁我可以轉買產品掛? 佢竟然話唔得, 只可以轉其他唔同療程, 仲話俾左既deposit 要喺三個月之內決定轉咩療程同俾埋尾數!!!! 大佬呀你奶過一次嘢你都唔會重覆去奶啦! 我重點會再去嗰度做facial 呀?!

    仲有由第一次有濕疹到宜家已經兩個月, 我啲皮膚都係時好時壞, 基本上有睇電視新聞都知, 濕疹係好難斷尾, 有時可能幾日, 有時可以幾十年都會發, 佢做美容, 應該喺呢方面好清楚, 但居然提出呢三個月既要求, 根本一啲同理心都無, 哄我俾錢買療程嗰時就得得得, 到有事嗰時就乜都唔得!

    令我最嬲既事就係, 嗰個美容院負責人同我講 "黎得做facial 既梗係想開心, 我地都係想你開心架". 根本就係超級諷刺! 我宜家就係俾你地搞到唔開心呀! 成兩個月塊面又紅又甩皮, 咩都唔食得, 連出個街都驚會出汗都會驚感染個傷口. 正常生活都打斷哂, 唔想見人, 連鏡都唔想照! 佢地就話知你將責任推得一乾二凈!

    宜家我只可以去消委會投訴, 我唔係要賠咩錢, 我只係想還番個公道俾我.

    我分享出黎只係想俾各位sis 做個警惕, 出去做facial 嗰時要小心, 呢個世界有好多人只係掛住賺錢, 但我就只得一塊面, 甚至可能連健康都賠埋. 俾錢之前真係要睇清楚問清楚. 出事以黎我有keep 住影相, 用黎做證據

    嗰間美容院位於尖沙咀, 細細間得一間, 隨時執左咩都無得賠.

    各位sis唔好幫襯佢, 我唔想再有受害者.