我的婚期 .... 遙遙無期. 真係有 D 唔開心.



  • 我都 30 歲, 同佢岩岩買左樓, 預備結婚用. 但買樓我屋企人借左 30 給我們. 但我屋企人無話要我地即刻還. 但佢一心想早些還曬佢. 就打算用我地筆結婚錢去還, 每年大約還 10 萬, 咁即係話要還 3 年, 我而家 30 歲, 再過 3 年就 33 歲, 還曬我地由 0 要開始儲錢結婚, 我計過我 36 歲先可以結婚, 36 歲仲結黎有乜野用. 結唔結都吧. 我有時都唔知佢想緊乜野. 覺得佢好無用, 思想好幼稚, 做人無計劃. 點解唔會為我著想吓, 仲要我幫佢生 BB, 我唔想做高齡產婦, 佢好自私, 從來無為我我著想過. 我對佢十分之失望. 同佢講結婚已經講到口都嗅. 去佢屋企食飯, 佢阿媽好客氣咁同我講, 你大個女啦要好好為自己著想, 快 D 結婚, 買左樓後就快 D 安排結婚既事. 因為之前佢個仔同佢阿媽講, 買左樓後會結婚. 我心想, 你個仔話唔結住, 唔係我, 呢 D 結婚既事, 唔係我一個人去話事. 我就笑住口答佢話"得架啦" .. 做人做到我咁, 真覺得有些失敗. 


  • 唔好咁灰啦, 我同你情況差唔多, 買左樓, 層樓係bf 既名, 佢用曬d 錢去買樓, 提都冇提過幾時結婚, 我都唔知點...





    佢阿媽新年o個陣問我地幾時結婚, 我都唔知點答, 咪話: "唔知佢(bf)呀..."


    點知佢媽仲話: "係佢唔想定你唔想呀?"


    唉~ 真係有口難言, 唔通我當住咁多人面前話你個仔提都冇提過咩?! 我係女仔, 29歲都唔細啦, 你估我唔想咩? 你個仔唔開口, 唔通我自己去擇日, 排期呀?! 真係有怨無路訴呀!



  • candy,





    你男朋友係唔係好要面?? 佢唔想欠你屋企人呀.... d大男人係會覺得自己無面人架喎!!!





    cc,





    你同你男朋友一齊幾耐呀?? 係唔係一齊住呀...你有無問過佢你地既將來呀??




  • Hi cc





    結婚係每一個女仔既夢想. 但佢一手將我既夢想幻滅曬.





    每次有結婚酒飲, 事後我阿爸阿媽事後都會好開心講, 將來我個女要點點點 .. 我都唔夠擔插咀話我有排都未嫁得.







  • Cindy


    既然你屋企人都借$比你地買樓, 你咪同佢講因為佢地都係諗住你地結婚先會借$囉. 講真, 結婚同生仔一樣, 無得話要有左well plan先, 根本人人定義唔同. 只要想就好做啦.



  • 80:





    我同我bf 一齊9年啦, 半同居啦, 一時返自己屋企, 一時就去佢度囉 (因為我屋企人都係比較傳統, 唔接受同居), 佢買樓都係因為諗住結婚後有二人世界而搬出黎住既, 但事實而家買完樓已經冇曬錢, 我地兩個搵得唔多, 一邊供樓, 一邊儲錢真係唔知可以儲到幾時囉.





    可能你會問點解買樓前唔諗清楚$ 既問題, 事源係bf 既阿媽... 原本我地諗住自己有個安樂窩住下就算, 諗住買d 平d 細d 既單位, 但佢媽極力反對, 其間又有好多來自佢家人既壓力, 最終我地就買左間百鬆d 萬既, 原本留黎結婚既錢就擺曬落首期度... 所以而家就搞成咁喇!



  • Candy,





    不如你同bf 商量下, 筆錢遲d 先還, 或者一年還5-6萬, 然後一邊儲錢結婚囉, 年紀唔細啦嘛, 解釋俾佢聽做高齡產婦好危險架!



  • to get married only need HKD$360 register fee!! come on!!!



  • cc / 我都有同佢講過, 佢份人就係硬頭. 原先我搬左去新屋住, 而家我又搬返去媽咪住. 因為都無乜意思.





    Mandy / 話就話結婚係我地 2 個人既事, 比 D $ 簽個名就係結婚. 但實際係另一回事, 係關好多人既事. 就算我地 2 個同意, 雙方家長一定唔得, 因為佢地係好傳統既屋企人佢地想攪得好好睇睇.



  • cc 我同你個 case 差不多.





    我地都係買左平平地既舊居屋 150 萬. 原先佢都無同我商量過, 打算將我地用黎結婚筆錢+ 佢阿媽比佢既首期錢 + 我屋企人既借比我地既錢, 全部做曬首期. 以為向銀行借埋餘下部份, 就打算分 10 年還, 我就問佢, 你用曬 D 錢黎做首期, 咁邊有錢結婚? 邊有錢裝修? 佢就話用我地自己私己錢去比裝修, 我就火都黎埋, 我話用曬 D 錢萬一有咩事(如失業, 有病)點算? 去做乞衣? 佢先如夢初醒. 我真係頂佢唔順. 原先佢屋企人叫我地買 D 新樓, 250 萬以上既私人樓. 佢都心思思, 但我唔準. 因為我地入息唔多, 又唔係話響大公司做. 所以我唔比佢買. 佢真係唔用腦想野.



  • Candy:





    有時d 男人就係咁架喇, 做野都唔諗下之後條路點行, 講真丫, 結婚都要籌備成年, 唔係話結就結架... 而家我都唔知點呀, 一個月儲得雞碎咁多錢, 又唔知佢想點wor, 問佢, 佢就只係話買完樓仲邊有錢丫, 慢慢儲囉... 咁究竟儲到幾時先夠?! 你唔嗲唔吊咁, 都唔會有耐性坐低大家傾下, 佢只係會覺得"無辦法"~ 天呀! 我有時都覺得佢好唔成熟~



  • 我以我 D 同事 / 朋友同我埋怨老公點點點, 乜乜乜 ... 我當時唔明佢地感受, 而家我真係完完全全地感受到. 睇怕我都要加入佢地既怨婦會.



  • 以我個人意見:


    既然你同你男友都plan左結婚,


    可否同你屋企人講還錢時間拖長少少,


    例如分五年還,


    另外你男友屋企人可否幫人幫你地結婚開支呢?


    你女家屋企人都借左錢比你地買樓......


    既然男家屋企人都想你地快快結婚,


    可否叫男友開口幫一幫,


    其實婚禮大有大搞,細有細搞......


    你可以搞得簡單些,


    自然可以快快夢想成真啦!



  • Hi lee





    其實我屋企無叫我地盡快還, 我媽講, 總之我地有鬆動錢先還比佢, 可能佢真係要面啦, 想盡快還曬. 大男人(我又唔可以怪佢).





    但點解佢唔想吓, 可以結左婚先, 收返黎果 D 禮金及用黎還比我媽咪一樣. 佢個腦係唔識得轉灣.





    算啦, 我都係呻吓 .. 佢咁想我都無法.



  • 我又係同大家一樣婚期好似離我好遠咁諗起都想心淡咁



  • 不如你同你bf講,因為你想生bb,唔想做高齡產婦, so how about let's get married "earlier"?



  • 令我想起一部電影, 這麼遠那麼近





    如果 over 30 歲先結婚, 我都唔想. 因為我唔想做高齡產婦, 因為我朋友剛好 30 歲生頭一胎, 結果個 BB 要 6 個半月就要出世. 否則大細不保, 我朋友平時身體好健康. 我地古都古唔到會咁. 不過而家好彩大細都無事.



  • Hi Alias





    唔啦, 如果為左生 BB 而要佢同我結婚, 我覺得自己好以借種咁.





    我咁唔開心, 是因為佢無為我想過, 無為我地既將來著想.





    有時見到身邊朋友結曬婚生曬仔, 見面就成日問自己幾時到你, 我都係笑一笑算了事. 以前就會講計劃緊. 因為本身我地真係計劃 08 年結婚架 .. 而家都唔希望 D 乜.





    我決定去學自己想學既野, 就係 PIANO .. 充實吓自己.







  • Candy,





    e....你男朋友都幾聽佢屋企人話家喎~ 如果我係你, 我實會同佢講, 你亞媽成日問我地幾時搞結婚d野喎~ 睇下佢點答囉...如果佢真係話無$$既, 你咪講你條q比佢知囉...or同佢亞媽講, 你地唔夠錢搞婚禮囉....可唔可以細搞囉~



  • cc,





    嘩...9年...咩青春都比曬佢啦~ 註左冊先, 唔得咩??



  • 我同我honey 都拍左10年拖啦, 但我又冇話一定要幾時結婚最主要係因為我唔想擺酒, 但雙方家長又要擺頭痕~



  • 80:





    註左冊先... 呢樣野我冇諗過, 因為我覺得一日過搞冇咁麻煩, 攝影, 租衫, 化妝等都唔駛搞兩次嘛, 而且一日過好似開心d 咁~





    而家我都唔諗咁多, 其實自己唔係太鍾意小朋友, 係我bf 想生囉, 但佢又係同candy 個bf 一樣, 完全冇諗過高齡產婦既問題, 所以我都費事催佢. 早幾年都有同佢提過想影左婚紗相先 (因為o個陣後生d, 影出黎都靚d), 之後當然係不了了之啦..