頭條日報情人節之旺角街頭求婚版真實相版
-
-
求婚記 -- 在旺角中心呼喚愛 2007/1/26 上午 09:09:53
二OO六年四月二日。陰天。
今日係一個好特別既日子，生活左28個年頭，人生路程都差唔多走左1/3喇，但係都從未有過好似今日咁緊張。
著起為左今日而買既西裝，我望住鏡，不停對鏡裡面既我講︰『你要加油！唔好怕！你要加油！唔好怕！你要‥‥』。係，我怕，我真係好怕，因為我怕萬一失敗左，我就會失去一個可以令我改寫下半生既機會，不過我更加知道，如果我唔去做既話，根本就連半個機會都唔會有。GERMAN，為左將來，為左你所愛既人，你要勇敢，�咱X你最大既勇氣。轉身，出門，求婚去！
下午三點。旺角BODY SHOP。距離預定時間重有三個鐘，不過呢三個鐘絕對唔易過，要成功既話，事前準備一定要做得好。
首先我要去實地視察環境。我所選擇既係被譽為旺角人流最多既 -- 西洋菜南街，亦即係D人成日約等人既BODY SHOP 果條街。名副其實，眼所見既全部都係人，我由街頭一直向油麻地方向行，雖然封左路冇車駛入，不過兩邊一早就比上網 / 學車PROMOTER 霸住曬，我心諗︰唔通要買位？不過好彩，行到去周生生對開既馬路開始冇乜人擺攤位，『舞台』地點總算係搵到喇。
睇睇錶，嘩！咁就用左15分鐘喇，時間無多，立即進行下一步計劃 -- 花。女朋友鍾意玫瑰花，咁求婚就當然用番玫瑰喇，其實束花一早係兩個星期之前係花園街訂好左，不過要去�奕ㄞu係要花一D時間，話遠唔遠，一來一回都用左成半個鐘。唔知點解，我都唔係第一次拎住D花係條街度行，不過今次好似特別多人眼望望咁‥‥定係我心理作用呢？唔理得咁多喇，行快兩步。雖然今次係小弟一個人既事，不過呢件事得我自己一個搞真係唔夠，所以我一早邀請左班識左十幾年既好兄弟幫手。人手分配如下︰
1) 攝影師 -- 兩個。為左記錄低呢個可一不可再既時刻，攝影師不可少，有兩個就更加可以做後期剪接添！
2) 音響總監 -- 一個。要係鬧市示愛，冇個咪冇套喇叭又點得呢？當然我又唔係專業級，幾經艱苦、四出乞求之後，幸得以前中學一個呀SIR借出手提無線喇叭組合，再一次︰多謝曬！
-
3) 派傳單員暨場面控制員 -- 4個。玩到咁大陣像，無非都係想有多D人見證呢件事，不過又怕D路人唔知我搞乜，所以我影定左好多寫左我呢次求婚既傳單，到時派比所有圍觀既人。當然喇，咁既 ROAD SHOW，我完全冇呢方面既經驗，所以我要D人幫手控制場面，唔好囍事變‥‥『睬』！
4) 兄弟女友 R -- 一個。任務︰秘密。
5) 神秘人 -- 一個。任務︰秘密。
一切準備就緒，距離開始時間重有個半鐘。音響SET好，彩排又彩排左好幾次，冇野好做，我地就係周生生外面等。你知唔知當時我諗緊咩呀？話你知丫，我乜都諗唔到，我只係覺得個人係度震，直情係由個心度震出黎，我極力控制自己既呼吸，叫自己冷靜，冷靜。有史以來時間過得最慢既一次，或者正確D講，個時間根本就停留左冇郁過。街上面人來人往，望住一個個陌生既面孔，我突然間產生左退縮既念頭，不如就到此為止喇！不過我知道到左呢個地步，要退都唔係容易，又如果我真係放棄左今次，我會唔會再有咁大既勇氣呢？GERMAN，你得既！頂硬上喇！
要黎既，始終要黎。下午六點，女友落堂。我去到佢上堂既大廈門口接佢(朗豪坊附近)。為左要呃佢去到我地既『舞台』，我較早前對佢講左個大話，話我地成班人會去BALL，重要著得好隆重果隻添！所以當佢見到我著曬西裝咁，一D懷疑都冇。
話咁易，成功到達『舞台』。SHOW TIME！
兄弟女友 R 二話不說，一手捉住我女友，扮曬要約佢去買衫買化妝品，順勢令佢轉身背住『舞台』，分散注意力。呢個時候，企係『舞台』準備既我一聲OK，攝影師ROLL機，音響總監播出�U女情歌 -- 『老鼠愛大米』。
『傻豬！』我把聲從喇叭播出黎，吸引到我女朋友既注意。當回個頭黎望到我既時候，佢先係呆左一下，然後就好似識穿曬我既計劃咁，想衝過黎叫停我，好在兄弟女友 R 機警，拉實佢唔放手，佢只好乖乖企係度當我既『觀眾』。
緊張，手芯出汗‥‥我深呼吸一下。『對唔住，今日並唔係咩舞會，我呃你黎呢度，無非係想借住呢個機會，企係旺角中心既街頭，就係咁多人面前講出我以下既呢番話。』
人開始增多，不知不覺間，我地已經被差唔多五十個路人包圍喇。手震、手震‥‥
我提醒自己要冷靜，唔好理身邊既所有野，只要將所有注意力都放係佢身上。我望住佢，而佢亦都好留心咁一路望住我，一路聽我講野。唔知點解，係呢一刻，周圍都變得好寧靜，人聲、車聲、所有嘈雜聲，一一都消失曬咁，我覺得自己好似身處一個好空曠既地方，一個只有我地兩個人既地方。
『唔經唔覺我地拍左拖五年喇！記得有一次同你去泰國旅行，當架旅遊巴返緊酒店程中，我同導遊借左支咪，我當住車上四十幾個團友講，我對你既愛會五十年不變，就算係變，都只會變得越黎越愛你，唔知道今時今日，你會唔會覺得我呢個承諾貨不對板呢？覺得我唔夠愛你，未夠細心、未夠體貼，但係我可以向你保證，係將來既日子，我一定會更加珍惜你。』
講到呢度，女朋友既眼淚就好似瀑布咁湧出黎。佢係一個好感性既人，好易感動，好易喊。
『無論將來有咩開心、唔開心，我都會一一同你分享，我會同你一齊面對任何既困難，我對你既愛，就好似以下落黎既呢首歌咁‥‥』
-
女朋友轉哭為笑，可能因為我個樣太過搞笑喇，講真，當街賣唱我都係第一次。
神秘人出現！我從神秘人手上接過花，再繼續︰『我成日送花比你，目的都係想你開心，而今次呢束花，我行左好多條街，睇左好多間花店，然後簡左呢束我覺得最靚既花，係呢度，送比你！』
聽到現場有少少掌聲，不過‥‥個SHOW未完喎！
『個老板娘問我，四月二號又唔係D咩特別日子，點解你會買花既？我同佢講，四月二號唔係咩日子，但係如果可以將一個咁平凡既日子變成個值得紀念既日子，你話唔係更加有意義咩？我希望，從今以後既四月二號，都會成為我，同我將來既太太既求婚紀念日，我相信呢個世界，就只有你，係最適合既人選，唔知，你會唔會幫我實踐呢個願望呢？』
神秘人再次出現！介指！！！一步一步行到去女朋友面前，打開介指盒，慢慢跪低，舉高介指，我最溫柔既聲線講︰『我愛你，求你嫁比我！』
就好似去到最後審判咁‥‥多日黎既準備，為左呢一刻，我成個星期都睧唔著，將台詞背過無數無數次，對住鏡練習，對住我隻貓練習，行過好多路，睇過好多間首飾店‥‥一切一切，就係為左一個『答案』。
一秒‥‥兩秒‥‥三秒‥‥，佢一D表示都冇‥‥我�咱X介指，慢慢套係佢既手指，我再問佢︰『我愛你，求你嫁比我！』，我好想要一個答案，一個令我人生得以完全既答案。
佢依然冇出聲，只係用佢手上既花，係我頭上面打左一下。打？！打者愛也？！係我重係度『解碼』既時候，已經聽到好多好多見證者既掌聲！
我成功喇！我忍唔住立即企起身好用力咁攬住佢，我好想好想比佢感受我對佢既愛，無視在場過百人面前，我地係街度擁抱左兩分鐘，最美好既兩分鐘！
P.S. 大熱天時，要班兄弟著曬老西企街，真係辛苦曬喇！兄弟女友 R，感激你拔刀相助！
-
糖衣的背後有什麼人會想到是人性的真面目!情人節公開愛的宣言令幾多人驚訝!這邊廂為女友預備婚禮, 那邊廂和另外一個女仔曖曖昧昧! 你有沒有想過你正在傷害一個弱小心靈, 她仲痴痴的回味你剛為她慶祝的那個生日!!你有沒有想過她為你做的一切是真心的!!她仲以為你真的很忙不能陪她過情人節!她萬萬想不到你為她這樣補祝情人節!為她製造了一個一世也不能忘記的驚喜!傻傻的她只怪自己有眼無珠, 不聽身邊人叮囑麻目地將真心相許!撫心自問 ?!她有否做錯!什麼不能講清楚?你為什麼要製造這個驚喜給可憐的她等她獨自承受?
最後衷心祝你和你的正印女友恩恩愛愛和白頭到老!希望唔會再有無辜女性錯將芳心允許!