終極挑戰 - 環走船灣淡水湖

我都分享一下行船灣淡水湖果陣既經歷:

十二月二十六日十一時二十分同朋友一齊由烏蛟騰出發, 自知呢條路線路程長又難行所以不敢大意, 出發前飲定寶礦力以保充體力. 由烏蛟騰至馬頭峰一段尚算好走, 同一般遠足徑無異, 由馬頭峰開始至觀音峒就冇咁好行, 路面崎嶇不平及較為浮滑, 上落斜頗多, 經驗不足者隨時要手足並用, 觀音峒至鹿湖峒一段路面較好走, 但唔知因乜解究呢段路有好多「地雷」, 我同朋友幾乎踩中! 沿途見到好多又紅又紫既石頭, 相信係含有大量鐵質之緣故. 由起點至鹿湖峒用左兩小時四十五分鐘完成, 比標準時間快些少.

由鹿湖峒落山一段實在好斜, 但現時已經築起梯級, 難度有所減低. 到鵝髻頂後, 艱辛旅程又再展開, 由鵝髻頂至長牌墩一段路多為崎嶇不平, 有幾個上落斜位置更沙浮石滑, 跣到救命, 非手足並用不可, 稍有差池隨時非死即傷, 仲要行到扯曬哮, 我行到長牌墩落山時滑左一腳, 最後相安無事, 之後同朋友速速落山至伯公咀, 行一段小路後沿車路出主壩. 由鹿湖峒至主壩用左兩小時五十五分鐘完成, 全程一共用五小時四十分鐘完成, 比標準時間快一小時四十分鐘. 行到鵝髻頂期間仲見到有民安隊直昇機經過不斷問座標位置, 好明顯有人出事, 但發生咩事就不得而知.

完成整段路線後向主壩影日落, 但皆因空氣實在太差, 對焦難度相當高, 只勉強影到幾張, 到太陽落山後先搭車出大埔完成呢日旅程.

除夕當日我將會同朋友上吊燈籠操山, 預覽新界東北一帶, 為日後行走「烏蛟騰 - 鹿頸」一線安排行程, 呢條路線同環湖路線一樣難度五粒星, 但我同朋友會因應情況決定是否中途退出, 皆因呢條路線會受潮漲影響.

到翌日早上起身對腳有少少軟, 但冇之前行北潭凹至西灣亭(經蚺蛇尖)痛得咁犀利. 總括來說環湖路線難度略低於北潭凹至西灣亭(經蚺蛇尖), 但呢兩條路線對於體力要求相當高, 若當日身體狀況差千祈咪行, 否則一定call硬直昇機.

bored@home is me