尋日同小朋友解釋逃犯條例同6月9日既遊行，小朋友聽完之後就話想離開香港，去安全啲嘅地方。其實早陣子我都有reaearch關於移民既事，都有咁嘅想法。但當聽到小朋友咁講既時候，就被當頭棒喝。我同佢講，呢個世界冇乜地方係絕對安全，我哋唔應該因為自己屋企變得危險就離開，而係要盡力保護香港。 如果逃犯條例通過左，以下嘅野絕對可以發生，我並非危言聳聽，而係現在嘅修訂無保障以下嘅事唔會發生: 我哋囝囡響網上講下中國共產黨，然後被大陸以背叛國家罪、分裂國家罪、顛覆國家政權罪、煽動顛覆國家政權罪等等捉返去。 我哋老公既公司因為響大陸唔知犯邊條法例被凍結沒收資產，繼而失業。 我哋老公因為公司撤資而失業。 我地教會既牧師傳道人因為短宣被捕。 我哋囝囡既老師因為講六四而突然失蹤。 外國撤銷特區護照既免簽證，無得隨時去日本。 而如果你哋有留意，成件事係好唔合邏輯: 中國內地司法指數排名82，香港16。點解將逃犯由司法制度比較完善既香港，移交去較落後既中國內地既過程，香港對疑犯完全無任何保障? 完全賣豬仔咁。 原本既法例橫睇掂睇都擺明刻意剔除中國，特登加句「中華人民共和國或其任何部分除外」，中國內地司法同人權又無進步到，無啦啦做乜要加返佢? 唔好同我講係因為潘曉穎命案，台灣講明話唔收。 香港特首一個就可以決定一個人會唔會被賣豬仔，會唔會兒戲左啲? 仲要無講明規定內地邊個部門可以申請，真係乜人都可以叫香港引導。 一條咁重要，影響咁深遠既法例修訂，點解可以咁趕，得20日公眾諮詢? 既然特首同官員話係我地唔了解，咁點解唔講到明先? 6月9日請大家企出嚟為自己同小朋友嘅將來爭取反送中。