靚 , 唔好太過分 -- 想分享我係美容中心經歷

[busychung]

坦白講句 , 有邊個女仔唔貪靚 ? 成日聽人講女人扮靚錢唔慳得 , 又有幾多人因此踏上不歸路 ? 就係因為一時貪靚之故 , 令我而家陷入人生一個危機中.

幾個月前 , 我決定成為xx beauty中心會員 , 成為會員可以免費享有一個服務一次 . 而我竟然就發神經咁揀左個永久脫毛服務去做 . 係安排左時間之後 , 我終於幾日前上去中心體驗 .

以前我都有去其他美容中心做免費體驗 , 都可以好決斷拒絕佢地推銷 . 今次亦覺得自己一定做到 , 所以美容師開始向我推銷服務時 , 我馬上拒絕 . 點知我太自大了 , 我根本未體驗過咩叫疲勞轟炸 , 無錯 , 個美容師就係開始轟炸我 , 佢向我首先推銷左一個磨皮 , 話我個情況唔做磨皮等於無做脫毛咁際 , 然後再推銷一個 facial , 講俾你地知一個疲勞轟炸 ge 技巧 , 就係美容師發現講極個客都仲未應承時 , 佢地會講「你乖啦 , 做啦」「當我求你啦」, 最後唔駛講 , 我中左招 , 碌左卡 , 兩項服務夾埋有一千. 好不容易做完療程 , 另一個職員帶我去一個會客室 , 跟住惡夢就開始 .

接下來係佢地個美容顧問見我 , 佢話睇得出我有心做 , 希望我做哂個療程 ( 其實我真係有心做 , 怪不得他人 ) , 但佢要我一次過俾哂 , 我話唔得 , 太貴, 佢又出動個種跪爹爹求娘娘 ge 演技去「求」我做 , 仲幫我搞到有「優惠價」 , 好啦 , 我應承了 , 然後叫我做埋磨皮 , 其實呢個係佢夾硬幫我加上去 , 可惜我簽哂單 , 有簽名 ge 個張仲係佢地手上 , 拗都無用 .結果連埋之前個一千 , 我夾埋碌左成萬多元先可以走 .

一離開棟大廈 , 我真係成個人 down 哂 , 除左 dowm , 仲有嬲 , 其實我真係有心去做療程 , 但佢地只想係我身上掠一筆 , 但就係因為我有心做療程 , 我嬲 ge 仲有自己 , 就係因為自己貪靚先去做會員 , 就係因為自己有心做療程 , 人地講到佢推介 D 野有幾好就信 , 結果搞到自己成為左「水魚」. 我越想越自責 , 打俾男友報到時仲忍唔住喊 .

而家我決定將件事係度講 , 都可能會俾你地笑我咁多前車可鑑都中招 , 當然我都唔想再有人步我後塵 , 而且我經此事更加明白「自然才是美」, 其實如果平時自己都有用護膚品 , 又唔係樣衰到出唔到街 , 絕對無必要再花錢去美容中心 , 若干日子前我同幾個朋友先向另一個朋友嘮叨要佢多 D 護膚多 D 美容 , 咩「呢個世界無醜女人 , 只有懶女人」 , 就係呢句話害死左唔少人 .

叫做不幸中的大幸 , 係男友同家人都知我出左事 , 當然俾佢地鬧得好勁 , 但亦幫我分擔左心理上同財政上部分壓力 , 但我仲要上去間中心一段時間先做完個療程 , 所以危機仍未真正解決 . 最後想同各位姐妹講 , 如果真係要去美容中心 , 千祈唔好俾佢地拎到你張信用卡 , 一俾左張信用卡佢地就會開始掠水 , 如果真係俾左張卡人 , 佢地又開始轟炸你時 , 就算你用緊咩服務都好 , 即刻走人 , 寧願連卡都唔要 , 即刻打去報失好了. 老實說佢地呢種推銷手法目前合法與否大家都心知肚明 , 消委會同警方又幫到幾多呢  ?