豬媽媽懷孕日記

我第一個舉手做你的聆聽者...HeHe

hi~之前淨係掛住問你野，都唔記得恭喜你! 恭喜曬呀!!!!!我仲等緊運到，真係羨慕你喇~~你等緊派彩o既時候有無咩特別感覺架？

我今次真係無咩期望, 因為諗住計錯數, 多數唔中, 所以都係諗住等m到

11月9日
 今朝探體溫36.52, 己經第14日高溫啦, 我都好想知道自己會唔會中獎, 我老公摸我, 話我好熱, 好似發燒咁, 我話起身驗下, 我唔用david紙驗, 我用支在萬寧買$25雜牌子驗, 一驗即刻一深一淺, 兩條線都有色, 我有少少發夢的感覺, 即刻用埋david紙再驗, 又係一深一淺, 好開心呀, 但又唔知係咪真, 諗住上床再訓多陣, 一陣再睇清楚個result, 但係訓咗上床, 又即刻落床, 成個人醒曬, 根本訓唔番, 我只係識得係個廳度行來行去, 希望時間快d過, 可以確定個結果
 
 最後我好肯定我一定係中獎, 本來想等到20日先睇盧乃本, 但係無張醫生紙在身邊, 好似好無安全感咁, 所以我即刻打電話返公司, 講底去睇醫生遲d先返
 
 我去到醫生度, 放底小便比姑娘驗, 真好緊張, 唔知會唔會食炸糊, 最後醫生親口話比我聽我有咗, 我成個人鬆曬, 醫生仲寫埋紙比我廣華度做產檢, 但係好唔好彩, 我有少少感冒要食藥, 但係我都希望可以忍到唔洗食
 
 我即刻打比老公話比佢聽, 我自己本身己經開心到真係唔想返工, 不過最後我都有返工, 但要忍住唔同人講, 真係好辛苦, 但係為咗bb好, 無辦法啦
 
 其實我一驗到己經好想同你哋講, 但係我真係唔想無咗個bb, 我驚bb小氣, 所以唯有唔講住, 我相信你哋唔會怪我, 同時我知道好多姊妹都好想知道有咗bb
 的感覺, 所以我將呢段時間的所有事記底, 到適當的時侯, 再post比你哋睇
 
 放工後, 我即刻打電話去廣華查詢登記產檢, 但係無人聽, 唯有明天再打啦

11月11日
 今朝老公打來, 己經係廣華度約咗期做產檢, 12月19日, 老公仲話好在早d去登記, 廣華個邊己經話咗5月之前預產期個d全部唔收架啦, 好在早d攞張醫生紙去排期啫
 
 今日去睇中醫, 中醫己經把到個bb的心跳, 但係由排egg計, 今日先16日, bb真係勁呀, 中醫仲話, 瑪麗醫院有個姑娘, 又係好似我咁, 兩個星期己經把到心跳, 個bb出世仲係12磅, 嘩! 如果以我的身形, 生個12磅, 點生呀? 今日同昨天一樣, 又係頂唔順, 食咗一次藥, 每食一次, 都好後悔, 但係自己唔爭氣, 無辦法

11月12日
 今日打電話去港安約盧乃本醫生做產檢, 我唔敢約咁早, 由排egg起計六星期先見醫生, 咁啱來緊又放大假, 所以約咗12月11日, 我當時問姑娘, 己經在診所驗咗, 要唔要來到再驗多次, 姑娘話唔洗, 但係如果我諗住找盧醫生接生的話, 盧醫生新舊症都唔會接, 叫我到時自己問下醫生, 會唔會接
 
 我真係好擔心, 上次bb有事, 如果今次盧醫生唔接, 我又做咩要比錢去私家生喎, 我不如去政府生, 留番多d錢比bb用好過, 而Oscar老公話都係找番林勇行做, 但係上次係個度醫生話比我知, bb有問題, 所以有少少陰影, 但係老公話, 佢比較當機立斷, 叫我唔好諗咁多, 唯有放鬆d啦
 
 我而家每日都會飲2壼同2樽水, 因為大肚婆要飲多d水, 一日要有12杯先夠, 飲多d水, 好似話可以令子宮充血, 先夠比bb用, 我好希望你哋知道我而家的心情, 比d鼓勵我, 但我唔想博, 而家只好自己努力
 
 今日又係咳得好緊要, 把心一横, 快d食藥食好佢, 好過到時要食氣喘藥, 食咗的話, 個心會跳得好快架, 我個心跳得快, bb個心跳得仲快, 希望快d好番, 唔好再病啦

11月13日
 今日放假係屋企休息下, 食下嘢, 我而家有記錄底自己有幾多磅, 我唔想到時過肥會好辛苦, 我上次去港安見盧醫生時, 姑娘有幫我磅過, 116磅, 我諗最好到我生的時侯, 唔好過140磅, 應該差唔多, 今日都係唔爭氣, 又食咗一次藥, 其實中西藥都好啦, 我都唔想食咁多, 中醫有開到安胎藥比我, 一個星期三次, 但係我都唔想成日食, 所以我決定, 我放假的時侯, 會煲桑寄生蛋茶飲, 返工的話先食中藥, 隔住咁來食, 我諗我在放假前差唔多食曬佢d藥, 不過唔緊要呀, 我諗住放假期間, 飲住桑寄生蛋茶, 應該無問題

11月16日
 今朝早量體溫見到36.5, 真係驚架, 昨日37.7, 今日跌咗咁多, 我再量多次, 又去返37.77, 我諗真係量得唔好, 今日真係黑仔, 收到二嫂電話, 話老公個亞麻去咗, 點解我兩次有咗, 唔係搬山墳, 就係死人, 今次真係要找個好好的藉口唔去至得啦, 唔係有起咩事上來, 對自己身體都唔好呀, 我即刻打比老公, 問下佢有無收到電話, 老公都話要諗下先, 最後經過我同老公商量, 到時話我個個星期返深圳Training算啦, 不過我知道62 & 99, 實多多聲氣, 但係話比佢哋聽話有咗, 佢哋實唱通街, 為咗bb的安全, 都係博唔過, 同埋老公都想過到Oscar先比佢哋知, 費時有事上來, 又問長問短, 真係好煩架

11月19日
 昨晚半夜突然肚痛, 好辛苦, 其實我日日都有大大, 加上我有食多d菜, 同麥包, 可以幫助去大大呀嘛, 唔知係咪食得嘢多呢, 有時早上7:30食完嘢, 10點幾又見肚餓, 到食飯個時, 成個飯盒都食得曬, 好似昨晚咁, 我成咗成大大碟麵, 真係好好味, 以前食方包, 都只會食一片, 而家起碼要食二片, 因為一個人兩把口, 我媽咪仲話我小心到時會好肥
 
 我把口真係成日都唔停, 一見肚餓就要即刻食嘢, 唔食真係有少少想暈, 而家都咁, 遲d都唔知點算, 今日同老公去百佳, 見到有人吵得好勢利, 原來百佳有人撞到個女人, 仲有人話如果你真係有咗bb, 就要去睇醫生, 搞到好多人睇熱鬧, 但係吵來做咩, 快d去醫院or睇醫生好過啦, 到時遲咗去醫院都唔知點好, 都唔明點解d路人又唔幫手打電話, 只係幫手係度吵, 到最後有人話會做証人, 有咩事上庭告番百佳, 個大肚女人先識得打電話, 本來仲好似話自己走就算, 唔睇醫生喎, 我都唔敢行到咁埋, 有咩推撞到時就唔好啦
 
 都唔知係因為冬天定係有咗bb, 個人成日都好想訓覺, 昨晚都唔係夜訓架啦, 但係今日都要午睡, 可能bb第日出世之後, 會成日訓覺, 人哋話咁會好揍d, 我都希望係咁呀

11月20日
 呢排返工都係返工望收工, 有時真係情願無生意都好過自己激氣, 有時d客講極都唔明, 搞到自己好辛苦, 快d放大假就好啦, 好想同bb快d見面, 昨日回應咗哥斯拉, 其實真係好想話比佢聽我係有咗, 但係真係唔想一場歡喜一場空, 都係保守秘密好d, 我知到時大家一定會好開心架
 
 今日62終於打來叫我哋請定假做白事, 當然我知道一話比佢哋聽有咗, 佢哋實會開心到周圍講, 仲要我一定要到, 因為有多個人送一程呀嘛(我係話我肚入面個個呀), 不過老公即時好醒目話比佢哋聽, 本來無問題, 但係公司三個月前己經安排咗我上大陸training, 所以多數來唔到, 無計啦, 為咗bb講大話都要架啦, 最後62都唔肯放過我, 叫我返公司攞過人情喎

11月21日
 你哋咁多個都恭喜我, 我都好想回應你哋架, 但係又唔想bb小氣, 今日有個男同事唔睇路, 撞到我個nose, 搞到我痛到出唔到聲, 仲眼淚都出曬來, 咁另外一個男同事安慰我, 話佢無心架, 唔好咁啦, 我即好嬲咁話, 如果佢真係整到我的話, 佢呢一世都賠唔起呀, 個男同事即刻話, 你係咪驚唔係撞到一個呀, 我叫佢唔好再講啦
 
 點解62係都唔肯放過我, 我知道一話比佢哋聽, 佢哋就更加要我去, 都講到話要返大陸做嘢, 仲要叫我老公勸下我, 佢都short short哋架, 係咪而家少咗我, 就搞唔成呀, 又唔係, 佢自己要面, 唔想有人出席唔到之嘛, 我老公同佢講都明話, 話我今次要考埋試, 如果個試唔pass的話, 就唔洗做啦, 佢都仲叫我老公, 叫我盡量去, 佢係咪有病架

11月25日
 今日個人無咩胃口, 係咪之前開心得制, 食多咗呢, 可能bb都唔想我咁肥呀
 
 今日62又打來啦, 又係問我會唔會去啦, 我老公都係話唔去啦, 佢話算啦, 唔迫我哋, 又話叫老公個日唔好食雜, 要食齋, 你估周圍都有咩, 仲叫老公個日好4點到喎, 咁要返工架嘛, 你估話走就走咩, 仲叫老公返公司攞個人情, 你估而家有幾多公司會唔會同你講人情, 放你走呀, 佢都short架

11月30日
 一返工就好辛苦咁, 最好快d放假, 等我可以係屋企可以好好休息一下, 過咗今日, 由排egg個日計, 應該5 weeks啦, 但係一日未見到bb都好擔心, 有時都會諗下自己會唔會宮外孕, 好驚又出事呀, 不過見自己有胃口, 食到嘢, 個肚次次食完都鬼咁大, 好開心呀

12月1日
 今日我哋team lunch, 公司請食飯, 12點幾就同兩個同事去咗攞位啦, 見到張menu, 個同事係咁叫, 當然啦, 唔洗錢嘛, 我都食咗好多, 同埋今次戒口, 唔係戒得好清, 因為無人知我有咗, 同事叫咩都會計埋我一份, 蝦餃都有照食, 仲食埋芒果布甸, 食完都有少少內疚, 不過鬼叫自己忍唔到咩
 
 今晚有抽獎, 唔知bb會唔會好旺, 抽到呢, 果然抽到$300 coupon, 好開心呀, $300己經係最多架啦, 因為人人有份, 又圍圍都有, 都算唔錯啦
 
 仲有呀, 我食飯之前, 入咗去屈臣氏, 見到有個中醫坐咗係度, 話免費把個平安脈, 咁我諗住, 睇下佢有咩講, 點知佢一把脈就”周”眉, 但係把完佢只係話我心血小, 叫我買嘢, 好似把唔到我有咗咁, 都唔知佢係咪扮唔知架

12月11日
 昨晩都唔知係咪緊張得濟, 好夜先訓到, 今朝一起身, 有d唔想食嘢的感覺, 最好即刻比我見到個bb就好啦, 不過無理由真係唔食, 點唔想食, 都要食碗粥, 但係我連一碗粥都食唔曬, 到最後去到醫院, 我之前預約係第一個架嘛, 都唔知點解都未夠鐘, 來到竟然變咗第四個, 仲要黑到睇完第三個, 個醫生要上去接生, 最後等咗成兩個鐘先見到個醫生
 
 其實之前個醫生返到醫院己經見到我, 仲同我笑一笑, 到我入去見佢時, 佢的眼神好似話我知, 我知你來睇產檢咁, 咁我咪開口同佢講, 我睇產檢, 佢問我知唔知有咗幾耐, 我話最後經期9月30日, 又問咗我好多嘢, 跟住叫我訓上床睇下, 我同老公當時都不知幾緊張呀, 佢一照, 就即刻照到個bb, 仲話好過上次好多, 我即刻好開心, 但係好似見唔到個bb的心跳, 咁我咪問佢, 好似見唔到心跳, 佢話唔係呀, 係呢度呀, 我再睇清楚d, 真係見到呀, 我仲好似見到bb的頭仔同個身, 不過睇唔到手腳, 我咪問下個醫生, 好似見到頭同身喎, 佢話係呀, 同埋佢話計番size, 有8weeks半, 嘩! 成兩個月啦, 我仲以為得6weeks幾
 
 不過有另一樣嘢令我擔心, 就係做oscar, 當盧醫生同我講, 四個星期之後返來見佢, 佢仲話到時你應該做埋oscar, 我都預咗佢會叫我係港安做, 因為我呢次係醫院睇呀嘛, 唔通佢會sales出面d嘢咩, 當佢睇file時, 我都有問佢, 我上次oscar係林勇行度做, 同埋上次因為中咗18, 要抽絨毛, 今次就算照到bb無事, 會唔會都要抽, 佢即刻話, 因為我中過一次, 所以我算係high risk, 建議我唔洗做oscar, 直接抽絨毛做化驗算啦, 如果我真係唔想抽, 就先做oscar, 到醫生話要再抽, 先做, 其實我一早預咗要抽, 如果佢唔開口叫我抽, 而我自己決定抽, 有咩事, 我諗我會怪我自己, 但係佢都開口叫我抽, 起碼到時有事, 我唔會將所有責任推曬比自己, 當然我亦都唔會怪個醫生, 因為可能我無呢d福氣
 
 而家起碼我都鬆一口氣, 等12月30日做抽絨毛, 如無意外, 1月3日會有快速測試結果, 希望今次一切順利啦

12月15日
 今日終於見到Mandy上來報下平安, 都安心d, 不過知道佢有個無良boss, 就真係替佢擔心, 個boss好衰, 咁對d大肚婆, 可以去平機會告佢呀
 
 今日終於要同99食飯, 我一坐底除咗件外套, 佢就係咁望位我個肚, 其實我己經著咗件好厚的冷外套, 連二嫂都話睇唔出, 都唔明佢係咪恨抱孫恨都咁, 到食片皮鴨個時仲搞嘢, 佢叫我食, 我話我唔食啦, 佢話, 係呀, 唔好食鴨呀, 我話我從來都唔食鴨喎, 佢話, 係咩, 你從來都唔食咩, 跟住找番以前同我哋食過鴨, 飲過鴨湯個d來講, 我都費時啋佢呀

12月19日
 今日去咗廣華啦, 本來諗住政府都係麻麻哋, 但係去到又唔係, 前後只係用咗兩小時左右, 有時私家都要等咁耐, 但係都係乾等, 但係今次去廣華, 登記咗之後, 叫我先去比錢, 比$60係照超聲波費, 比完錢, 先驗小便, 再抽血, 照超聲波, 再見醫生, 我以為醫生都只係同我講幾句就算, 當然我去之前亦帶齊要帶的資料, 醫生真係問咗我好耐, 仲幫我檢查過, 話我宮內膜移位好多, 所以我相信, 如果我唔係呢次有咗, 來緊好快又要入醫院再做一次手術, 而今次政府醫生話的預產期係7月20日, 同私家係差一日, 私家話7月21日, 當然而家呢d日子都係唔準
 
 其實今日照超聲波的時侯, 起初我以為照唔到, 我問姑娘係咪照唔到呀, 因為我又唔係好急, 同埋見到畫面好以唔係好清楚見到咁, 姑娘話, 唔係呀, 仲指住個位比我睇, 仲放大咗, 我睇住個畫面好以見到bb個pat pat, 但係又唔係好確定, 我好想問姑娘, 點解我會認為個個位係pat pat??? 因為係個pat pat位上面, 我好似見到bb對腳, 仲有中間位, 好似見到bb對手, 跟住姑娘就同我講, 呢個係bb的pat pat, 我估中咗呀, 真係bb個pat pat呀, bb比上一個星期大咗1.31cm, 好開心呀, 我出到去即刻同媽咪講, 因為今日媽咪陪我來

12月30日
 今日去咗抽絨毛, 去之前都同自己同埋bb講, 唔洗驚, 但係去到又唔係, 好緊張, 當我同老公一入到房, 個醫生就問我, 點解要抽, 上之係唔好彩, 問我係咪驚, 我同老公都話抽咗安心d
 
 我訓到上床, 都有問個醫生會唔會照咗先抽, 佢話會, 我知佢本身都會幫人錄vcd, 咁我咪問埋, 可唔可以幫我錄埋, 佢話無問題, 佢一幫我照, 就好易照到啦, 佢話好好, 照咗幾分鐘, 好多個角度, 見到bb的頭, 手, 手指, 腳, 同埋腳趾, bb隻手仲係咁郁, 醫生話其實好正常喎, 一d都唔似有問題, 不過你哋要抽就幫你抽啦
 
 我好似上次咁, 我都唔敢睇啦, 佢一幫我打麻醉針, 我己經覺得好痛啦, 但係醫生無等多一陣, 就即刻抽, 嘩! 好痛呀, 我即刻縮一縮, 佢叫我唔好郁, 唔係就抽唔到, 我即時感到個肚好似硬咗咁, 我知道bb知道有人走入來佢個地盤度, 所以有反應, 醫生叫我唔好郁個時, 我己經好驚啦, 我係心入面咪叫bb快d走啦, 點知bb真係郁一郁, 我心諗, 我叫你走, 你真係走架, 你乖啦, 你比醫生抽埋先啦, 咁就無再郁, 後來老公話我知, 佢係畫面見到bb避個醫生支針, 我諗真係我feel到佢郁個時d動作啦, 估唔到佢識得避, 好醒呀

cywong,
 在此正式恭喜你!!

恭喜你呀！
 祝你一切順利，大人細路都健康！

恭喜你呀！一齊努力做個豬媽媽啦!

cywong,
 好精彩呀!!!
 恭喜你哂!!!

恭喜你呀！希望你一切順利！

cywong,
 之前一直都有睇你留言, 恭喜哂你.
 祝福你同你肚入面既BB一切順利~

心兒, 太太, energy, zzz, fit_gogo, wai,
 
 多謝大家支持, 不過仲有個結構性超聲波未做, 一日未做呢個, 一日都未安心

cywong,
 
 我係06年12月媽咪,恭喜哂，我一路睇，一路流淚，係鄧你開心ｏ既眼淚，祝福你及ｂｂ平安,但不要給太大壓力自己,平常心啦.
 
 我唔知原來大肚婆要飲12杯水,不過我真係每日超過12杯,直至生每日都有暢順'大大',無便秘,仲有我成日飲無糖檸檬水,我睇中醫書話檸檬安胎,燕窩就無食,bb出世,個個都話好白淨.

本來診所姑娘星期四晚打來, 問我來緊會去邊度生, 咁我話比佢聽荃灣港安, 咁姑娘話而家有新政策, 要自己星期一親自去book位, 我己經即時問姑娘, 要唔要比deposit, 姑娘話唔洗
 
 我星期六去攞信, 咁我去到, 姑娘又話, 唔知要唔要比deposit, 咁我咪自己打電話去醫院問囉, 有個男的接電話, 我問佢係咪星期一可以book床生bb, 我咪問佢要唔要比deposit, 初初佢話要比$30000, 咁我咪話, 香港人都要比咁多, 佢話, 香港人就唔洗, 上來book就得架啦, 咁我咪問埋早產or遲咗, 會唔會收架, 佢話都會收, 因為始終係自己人
 
 點知我今日上到去, 個姑娘話今日無得book, 佢話星期五下午五點半開完會話, 因為而家好多醫生, 出幾封信比d產婦, 等d產婦可以book幾間, 而家可能會收deposit, 但係收幾多就未知, 叫我明日再來, 咁我咪話, 我點明日再來呀, 我要返工架, 佢話我可以星期日再來, 但係之前診所姑娘講明先到先得, 到星期日分分鐘無位, 咁我點呀??? 我咪話, 你哋又話先到先得, 等到星期日無位的話, 咁我點呀??? 跟住有個女人好似話得事咁, 走出來問咩事, 咩星期日, 咁個姑娘咪同佢講囉, 點知佢又係問我, 唔可以明日再來咩, 我都未出聲, 個姑娘己經話, 人哋要返工架, 同埋人哋星期六打來, 又叫人哋上來book, 咁而家人哋上咗來啦, 咁點呀??? 跟住個個好似話得事的女人, 咪話而家幫我book咗先, 如果最後話要比deposit, 再call我返上來比, 咁我咪問佢囉, 如果到我上來之前, 好多人比咗deposit, 我又未比, 會唔會飛起我呀, 佢哋又話唔會, 留咗就一定有, 我咪話, 我住呢頭架, 我只係會來呢間醫院, 我唔去第間架, 有個姑娘係度笑, 我心諗, 你笑咩呀, 你做我, 你會點呀??? 跟住佢哋收咗我封信, 話會留位, 仲問我順產定開刀
 
 我坐埋一邊等睇醫生個時, 真係忍唔住哭咗出來, 我同老公話, bb點呀, 我book唔到位呀, 老公叫我冷靜d, 咁我咪話, 我好唔好打比盧醫生, 問下佢咁點呀, 老公咪話好啦, 你打啦
 
 點知我行番出去坐, 等睇醫生, 比我見到有個男人又係來幫老婆做登記, d人又係唔比佢登記, 佢又係嘈先可以登記到, 咁個個話得事的女人又係收咗個男人封信, 又無問人順產定開刀, 個男人咪問, 你而家收咗我封信, 咁你有咩証明比番我, 証明係book咗, 個女人話, 我哋會即刻入電腦, 無問題架啦, 我諗諗下, 真係好似無咩保障咁
 
 再來, 有兩個女人走來同個大陸女人做登記, 仲比埋$30000訂金, 醫院即刻出曬証明比佢, 嘩! 咁即郂有錢就咩都得啦, 而家又話未知收幾多deposit, 咁d大陸人來曬登記, 到時我哋去邊度生呀??? 好可憐呀!

a,
 
 咁我都要學下你先

最後我打咗比盧醫生, 我同番佢講今日的事, 我話, 老實講, 比著你係我, 見到大陸人放低$30000就可以留位, 仲比曬証明佢哋, 咁我哋咩都無係手, 得個講字, 收咗我哋封信, 有無位比我哋都未知, 咁我可以點呀, 而家己經唔係錢唔錢的問題啦, 要收deposit的話, 我諗點都唔會收我$30000, 就當我入院做手術咁, 收$8000 deposit, 咁醫院會唔會收大陸人的$30000, 而唔收我呢$8000呀, 盧醫生話, 我諗都唔會, 仲叫我比一兩日時間醫院, 佢哋今朝開完會, 應該會有公佈, 我只係覺得由係醫院到而家, 都係咁無助

後來診所姑娘打比我, 話盧醫生鬧咗港安個邊, 到底有無措施保障孕婦有位生, 最後佢哋答應收咗封信就一定要有位我哋生, 仲話港安來緊會有人比番個booking no.我, 但又無提到要收deposit, 咁我諗應該唔洗收掛, 但係有個問題, 如果收得deposit, 咁好似人哋去旅行咁, 醫院應該唔可以加價, 唔係咁比咗deposit, 又一定要去, 咁加好多, 咪比佢哋"禁"住搶囉

cywong
 
 弓喜你~! 祝你同BB 健康愉快~!

Rainbow,
 
 多謝你呀

Rainbow,
 
 多謝你呀

Rainbow,
 
 多謝你呀

昨日醫院終於打來, 比咗個booking no我, 但係到時係咪真係可以一切順利, 都未知

呢幾日好多內地孕婦的報道, 表面上好似好咗, 但係單單睇我個case, 我覺得己經好差啦, 我真係想像唔到, 到真係開始生豬bb個時會有幾亂
 
 我呢幾日條腰右邊好痛呀, 我打去問個中醫, 中醫話可能bb個頭向個邊, 所以我先咁痛, 我d同事同um都係咁講, 佢哋話等遲d bb轉咗個另一邊, 就無咁痛架啦, 但係到時咪要痛另外個邊囉

cywong
 你已經開左lee 個topic : 豬媽媽懷孕日記
 thread id: 1826406 posted by cywong
 on 2007-01-21 10:25:5
 
 請問可唔可以, 唔好係其他 thread 將你的日記又 copy 過去, 留d空間俾其他 mami 留言? 如大家有興趣睇你的topic : 豬媽媽懷孕日記, 我地會自己入來的, thanks !!!

其他mami,
 
 呢個豬媽媽日記唔係只係比我留架, 我之前同打算生豬bb個個topic的人大家話過, 有咗就會開呢條thread, 唔係只係我留架, 大家都可以入來架, 我係好後期先將日記post出來, 唔該自己睇番時間先啦

我想問下你哋有無人經
 
 http://www.beauty- holic.com/catalog/index.php? cPath=2_260_261
 
 買過嘢, 我想買肚紋gel, 因為比起卓悅平, 本來卓悅賣$184, 佢哋賣$135, 仲有其他大肚用的都比卓悅平, 大家應為信唔信得過呢???