130115 八吉 – 首會一夜干 $688 / 2



  • 早前月初沖繩縣政府晌崇光超市、皇室堡搞咗啲「沖繩食品節」、「沖繩文化美食祭」,推廣咗好多沖繩特色食品、當地名物泡盛……等等,突然對沖繩料理有啲欲欲想試。近年亦多咗好多人去沖繩自駕遊,小弟暫時未涉足過沖繩,深信總有一天會踏足這個日本最南端、被海洋包圍嘅小島嶼。雖然未到過,但卻有機會正式品嘗一下沖繩料理,地點就晌天地旬鮮.八吉,老友Ivan仲記得八吉以前晌彩星集團大廈地庫,原來上年10月中先搬過嚟亞士厘道27號。

    店家晌2樓,但一啲唔難搵,因為樓下大大個招牌一望就見。內裡裝潢帶有極重和風味,燈光柔和,以卡位為主,有4人或有6人,而且卡位之間亦以橫間木板相隔,唔會太大騷擾,但又唔會太焗促。餐廳尾仲有3間個室,以假塌塌米佈置,個室前門已預備好拖鞋,入內需要除鞋。其後跟侍應查詢,每間個室大概容納到6個人左右,3幾個人都可要求要個室,當然要預早訂啦,不過人少又要求要個室嘅話,有機會收最低消費,要視乎喺唔喺旺日;仲有就喺3間個室可打通晒,大概可容納廿多人,如果一大班人嚟開個沖繩小派對,氣氛應該挺熱鬧!

    當我哋去到,侍應已安排好4人座卡位俾我哋,即時遞上熱茶、熱毛巾。周圍所見,都坐滿客,但清一色喺日本人,日文滿場飛,幾有晌置身日本嘅感覺,而店中侍應都操著流利日文,小弟雖然經常睇日劇,但絕對喺日語文盲,咁點算?我仲諗住要手指指(嗰時去關西旅行食親嘢都喺靠篤手指),幸好有兩位一男一女侍應喺本地人,溝通完全解決晒,但佢哋講日文一樣好得架!期間幫忙收拾、換碟,食完晒所有嘢,又再次遞上一杯新熱茶同熱毛巾,服務真喺好貼心。

    餐前小碟 $30
    未點菜前,侍應就會先捧嚟一盆「前菜」,依個喺有啲日本餐廳嘅規矩,好似我哋上酒樓放低兩碟酸菜、花生咁。前菜喺任點,但就唔喺任食,按規矩每個客點選一款,款款索價$30,碟碟的的骰骰,盆上共有5款:枝豆、螢光魷魚、甜蝦、蟹膏、魷魚芥末漬。不過,其實可以唔要,如果想試多啲亦可以多要,比較有彈性。

    餐前小碟 - 甜蝦
    喺以鹽漬處理,蝦身細細粒,但就幾晶瑩爽口,味道頗鮮,帶微鹹。

    餐前小碟 - 螢光魷魚
    當然啲螢光唔會發光啦,佢哋被捉受驚時,身體同觸鬚會發出藍白色嘅光,所以先叫螢光魷魚,晌面前依小碟螢光魷魚,跟食一般魷魚無太大分別,帶點爽脆口感,不過就頗鹹。

    侍應捧完前菜之後,會再捧一竹筲箕魚鮮過嚟,其實一入玄關位水吧前已冰鎮住,全部都喺一手時令嘅季節靚魚或海鮮,取自多個日本漁市場。每一條都有名有價,伊佐木、地鯖、喉黑、鰺……等,不過索價唔平($2XX - $7XX),當然食靚魚要付代價啦。而做法又可按客人要求,可刺身、鹽燒、汁煮,甚至一魚幾吃都得,大可滿足香港人心多多、不甘單一嘅要求。不過,好老實,真喺唔便宜,就留待下次再多幾個老友嚟先再試!雖然無試到,但真喺好多連名都未聽過,好有大開眼界之感!

    翻完一轉餐牌,真喺幾心猿意馬,好多菜式都好有特色,又未試過。大致分為刺身、壽司、前菜(跟上述所講嘅餐前小碟唔同)、沙律、燒物、揚物、一品料理、麵飯、鍋物、甜品、套餐、飲品、日本酒。此外,主餐牌以外,仲有幾個特別推介嘅餐牌,好彩跟Ivan嚟之前都有睇過其他食評作個參考。由於小弟唔好酒,Ivan兄有少少抱恙,今晚就滴酒不沾喇。

    海葡萄 $58
    地地道道沖繩特產,又點可以唔試呢?以冰鎮奉上,墨綠色一串串,晶瑩剔透,外觀已相當有趣,咬落又真喺幾有魚子質感,怪不之得有「綠色魚子醬」美名,查實喺深海海藻,大自然真奇妙。味道幾清,帶少少鹹鮮,有卜卜脆嘅口感,大可淨食,所附嘅醬油可以不蘸。

    自家製花生豆腐 $55
    另一趣怪傑作,豆腐外形跟我哋晌街市見嘅布包豆腐沒兩樣,雪白嘅豆腐伴上醬油,上面有一點薑蓉點綴一吓。話佢趣怪,全因佢個質感,表面就滑滑溜溜富彈性,內裡就煙煙韌韌有黏性,食落幽幽花生味會隨豆香慢慢滲出,花生味又唔會太強而蓋過豆味,真喺一道有驚喜嘅豆腐料理。

    炸魚籽昆布串燒 $58
    另一道帶嚟驚喜之作,雖然佢中文譯「串燒」,但其實屬於揚物(即喺炸嘢),叫「串炸」貼切啲,哈哈!方柱形嘅魚籽昆布串炸,外表好平凡,上面唧上一抹沙律醬,再灑上大量木魚碎。之不過,內裡就喺平凡中嘅不平凡,一咬開外皮很甘脆,炸功了得,一啲都唔油,內餡全填滿希靈魚籽並夾雜少許昆布,口感特別!

    仙台風味厚燒牛舌 $88
    跟住再試佢兩款燒物,先上場喺厚燒牛舌,一客有 7件,伴有少量沖繩泡菜,唧點檸汁去油膩又可提提味。雖然唔喺好知何謂「仙台風味」,但啲牛舌燒得非常香,又有啲焦香位,牛舌嘅獨有味道亦頗濃郁,如果想帶點刺激,可撒少許辣椒粉,更惹味。不過,對這道菜最終嘅印象都喺有少少失望,因為一來唔多喺厚燒,塊塊牛舌都幾薄,二來咁薄,食起嚟仲有啲韌添。

    什錦魚乾拼盤 $158
    無叫到魚鮮,但就試咗另一道馳名嘅魚食「一夜干」,喺今晚第二道燒物菜式。據講一夜干喺北海道對當日捕獲鮮魚嘅一種食物保存處理方法,小弟就第一次接觸呢個食法。唔好見佢寫住「魚乾」就以為好似曬鹹魚咁,曬到「乾爭爭」,據介紹,啲鮮魚會以味醂、醬油、鹽、糖……‥醃一醃,再風乾,話就話一夜干,都唔一定要風乾成日,都喺視乎天氣、溫度、濕度,總之憑經驗。侍應話種類不定,視乎當日嘅來貨,總之一份拼盤包3款魚,真空空運過嚟,一夜干燒香之後,伴檸檬及蘿蔔蓉就可奉客。外皮又香又脆,味道帶點鹹香,魚味好濃縮,完全無腥味;至於肉質方面,有點挺實,但又唔喺「嚡霎霎」、「乾爭爭」咁,確喺幾好食,一客才賣百五蚊,值得推介。

    墨魚汁炒麵 $78
    數款麵飯中,以依個炒麵較為特別,麵條註明喺沖繩麵,加入墨魚汁製作,所以呈現全黑色,帶光澤,而且較為厚身,食落有咬口又有啲鹹味。以墨魚、豚肉、韮菜同炒,餸料落得唔少,鋪滿晌炒麵之上。除墨汁麵,豚肉喺依道菜另一亮點,因為用上沖繩AGU豬肉,果然肉味非凡,相當濃郁,又富油香,正呀。

    沖繩紅芋雪糕、沖繩黑糖雪糕 $35
    甜品方面,選擇唔多,6款雪糕(是日精選、綠茶、芝麻、沖繩鹽味曲奇、沖繩紅芋、沖繩黑糖)及1款綠茶布甸($48)。嚟到當然都喺想試沖繩名物,所以揀咗沖繩紅芋同沖繩黑糖雪糕。

    沖繩紅芋雪糕
    紅芋即喺紅蕃薯,做出嚟嘅雪糕呈粉紅色,雪糕很有牛奶香味,重點嘅蕃薯味亦不俗,不過,雪糕內有少少碎冰,要扣分。

    沖繩黑糖雪糕
    比紅芋雪糕更好食,黑糖味道非常之突出,口感更柔滑,我哋兩個都俾個讚佢,唯一要彈就喺咁好食嘅雪糕一客只得咁細球,好唔夠喉!

    如果閣下有夠大預算,又唔想煩諗乜食乜,套餐絕對喺心水推介。套餐名為「天地」($390)、「旬鮮」($480)、「和琉」($420)、「鍋」($420),7-9道菜,已包咗好多手本嘢,以上價錢喺一人份量,不過,點套餐最少要兩位起計。

    我哋都食到成9:30pm有多,唔算晏,侍應見好似無再有一輪客,原先枱上嘅晚餐餐牌都換過第二朝用嘅午餐餐牌,價錢比起晚市上嚟抵好多。此時,再跟無咁忙嘅侍應傾多幾句,佢介紹咗好多特色嘢俾我哋,例如沖繩牛、沖繩苦瓜(但我哋唔見餐牌有喎,原來午市有列出嚟,雖然晚市無,但一樣可以叫)、沖繩腐乳、生海膽伴芝士脆多士……全用上沖繩及其他日本食材,而最心動喺晌一、二月嘅逢星期三,做緊個「半額祭」呀,壽司、刺身、Suntory生啤賣半價,早知我哋就遲多一日先嚟幫襯啦!所以,Ivan兄即刻whatsapp佢另一班老友,訂定位下個星期三再嚟,啤一啤,食吓壽司、揚物小食,再回味吓啲一夜乾喎!


login to reply
 

looks like your connection to she.com messageboard was lost, please wait while we try to reconnect.